Tiaìraa 2006
Tapati 03 Titema 2006
TIAIRAA MATAMUA
Taiòraa : Ruta èv. 21/25-38
Irava faaitoito : 27 : « Ei reira ratou e ìte ai i te Tamaiti a te taata i te haereà mai na nià i te ata ma te mana e te hanahana rahi ».
E hoa here ma e,
Teie tatou e ìriti nei i teie tau no te « Tiaìraa i te haereà mai no te Tamaiti a te Atua ». E tau taa ê mau teie i roto i to tatou oraraa faaroo, e to tatou oraraa Etaretia.
I te mea e, o te taime teie tatou e hiò faahou ai i te mau parau, o ta te Fatu iho i fafau mai ia tatou, e to te hui faaroo Maru-Metia, te mau parau no To na hoìraa mai, e aore ia, ia au mai ta te ìrava 27 e haapapu mai nei, To na Haereà mai. E teie te tahi o ta tatou e hiò nei i teie mahana.
Tei roto Ietu i te Hiero no Ierutarema, ia au i te mau haapapuraa i te ômuaraa e i te pae hopeà no teie nei pene parau (21), te haapii ra O ia i Ta na mau pipi e te feia atoà o tei haere mai Ia na ra. E mai te mea, e taiò mai tatou mai te ômuaraa mai no teie nei pene parau, e ìte tatou e, e rave rahi te mau òhipa e tupu nei e te mau parau taa ê e te maere o ta Ietu e faahiti nei. Na mua roa, te parau ia no te horoà a te vahine ìvi taoà òre, o ta Ietu i parau e : « …e rahi ta teie nei vahine ìvi taoà òre i tuu i roto, i ta ratou atoà ra… ua hope roa hoì a na puè taoà rii i te tuuhia e a na i roto ». Tae noa atu hoì i te parau tohu no te huriraa i te Hiero o Ierutarema i raro, o tei faatupu i te maere, te huru ê e te uiuiraa i roto i te feia atoà e faaroo mai ra Ia na. Na reira atoà hoì i te mau òhipa fifi e tupu i roto i teie nei ao, te mau tamaì, te âueueraa fenua, e àro hoì te tahi fenua i te tahi, te tahi patireia i te tahi, e tupu te oè, te maì rahi etv… E i roto i ta tatou parau no teie mahana, te parau nei Ietu e, e ìtehia te tahi mau tapaò taa ê e te tahi mau piri i roto i te raì. E tupu te àti rahi i roto i te mau fenua, e haruru te miti e te àre. E tarapape te âau o te taata i te mataù, e e pau hoì te mau mea o te raì i te ueuehia.
E hoa here ma, e mau parau huru ê mau teie o ta tatou e faaroo nei, e e mau parau au òre atoà hoì i to tatou mau tarià, teie o ta Ietu e faahiti nei, ei faaìteraa Na na i te huru no to na hoìraa mai. E mau parau atoà ra o tei òre i maramaramahia e ta na mau pipi e te feia atoà o tei faaroo Ia na i taua mahana ra. Ua ìte atoà ra tatou e, teie mau òhipa, teie mau fifi e teie mau àti o ta Ietu e faahiti nei, te tupu nei ia i roto i to tatou oraraa e i roto i teie nei ao. Ua tupu mai na, te tupu nei e e tupu a, te mau âueueraa fenua, te mau tamaì, te mau àroraa, te maì rahi, te oè…E i roto i teie tau o ta tatou e ora nei, aita e mahana e aita tatou e faaroo nei i te tupuraa no teie mau fifi e teie mau àti i roto i teie nei ao, e te faatupu nei te reira i te peàpeà, te mauiui, te òto e te mataù atoà hoì i roto i te âau o te taata.
I roto atoà ra i teie mau parau o ta Ietu e faahiti nei, e ìte nei tatou e, te vai nei te tahi mau òhipa e aita a i tupu atu ra. E e mau parau atoà hoì teie, o tei tohuhia na e te mau perofeta i tahito ra. E e tupu mau a te reira. Te parau òaòa ra e te mauruuru rahi o teie ia o ta te Fatu e parau nei e : « Ei reira ratou e ìte ai i te Tamaiti a te taata i te haereà mai na nià i te ata ma te mana e te hanahana rahi ». Oia mau, e parau òaòa teie, i te mea e, te vai ra o te ìte atu i teie òhipa nehenehe i roto i to na tupuraa, …te haereà mai no te Tamaiti a te taata…
O vai ia taata faaroo, e o vai ia Maru-Metia, o ia i tuu i to na tiàturiraa e to na tiaìtururaa i roto i to na Fatu, e òre e hinaaro e ìte i taua mahana ra, te mahana òaòa rahi o ta te Fatu e horoà e e ìriti i mua i te aro o te hui faaroo e to te ao atoà nei, ia au mai ta te Fatu iho e haapapu atoà mai nei e : « e ua tupu anaè teie nei mau mea, e nânâ i to òutou mata i nià, e faateitei i to òutou upoo, te fatata mai ra hoì to òutou ora(28)…. Ia hiò hoì òutou i taua mau mea nei i te tupuraa, ua fatata ia te Patireia o te Atua, ia ìte hoì òutou(31) ».
Oia mau, to tatou tiàturiraa, to tatou faaroo, tei roto ia i to tatou Fatu ia Ietu Metia. O ta tatou e tiàturi nei, e hoì mai O ia i roto i To na hanahana rahi e To na mana rahi. O ia anaè to tatou Ora, e Na na e ìriti ia tatou i te ùputa o te Ora Mure Òre, e Na na e haafanaò ia tatou i te mau maitaì atoà no te Patireia o te Atua, to na Metua. E te riro nei to tatou oraraa i te ao nei, i roto i to tatou mau taime maitaì, te hau, te òaoa e te fanaò, mai to tatou atoà mau taime fifi, te peàpeà, te ahoaho e te mauiui, ei taime e ei tau o Ta na e horoà mai nei e e titau atoà mai nei ia tatou no te faaineine ia tatou no teie haereà mai No na. Ua horoà atoà mai ra O ia ia tatou i te raveà e itoito noa ai e e maitaì noa ai ta tatou faaineineraa ia tatou iho, i mua i te mau mea o te oraraa nei, « e nânâ i to tatou mata i nià, e faateitei i to tatou upoo… », oia hoì, e tutonu i to tatou tiàturiraa taatoà i nià Ia na. O ia anaè e aita atu o te nehenehe e tauturu, e faaitoito, e arataì, e faatià, e paruru e e faaora ia tatou. Eiaha tatou e faataupupu i to tatou tiàturiraa i nià i te mau mea o teie nei ao, i te mea e, e feia tatou tei au i te haatafifi noa ia tatou i nià i to tatou mau manaò e to tatou mau hinaaro taata, o te tumu rahi ia no to tatou mau ahoaho e to tatou mau peàpeà âau, aita tatou e matara ra, aita tatou e maha ra, e aita atoà hoì tatou e tiàma ra i mua i to tatou iho mau hinaaro. E faaòre i te tiàturi i te reira mau mea, e tiàturi ra i te Fatu o te Ora, « e nânâ i to tatou mata i nià, e faateitei i to tatou upoo… », e faaea roa ra i te hiò noa i nià ia tatou iho. Inaha, teie to tatou Ora e haere mai nei na nià i te ata ma te mana e te hanahana rahi. Ia maitaì tatou i roto i teie tau no te Tiaìraa i te haereà mai no te Tamaiti a te Atua.
Ia ora na.
Teìva TAPU Òrometua
Tapati 10 no Titema 2006
Tiaìraa piti
Ruta Evaneria :6 /3
Haere atura oia na te mau vahi atoà i te pae i Ioritana ra,i te poro haerea raa,i te papetito tatarahapa ia faaorehia te hara.
A tià e te nunaa e, te tae mai nei te marama io oe.
Aroharaa….
Ua tae faahou mai tätou i te tau no Noera, te tau no te fänauraa, e tau no te tiaìraa, te faaineineraa i te taeraa mai te fänau âpï. I roto i te tahi ùtuafare ; ia tae anaè mai taua taime ra, e faaineine te ùtuafare i to na taeraa mai : to na vähi taòtoraa, to na mau àhu, te mau pähii : oia hoì te mau òhipa atoà, e tano ia rave hia hou te aiu àpi e tae mai ai.
No tatou i teie poipoi, tei roto tatou i te tiairaa piti, e taata ê roa tei titauhia, no te rave i taua faaineineraa. Taa noa’tu ai te faanahoraa i ravehia e na metua : Iotepha raua o Maria, ua faanaho atoà hia te tahi taeae, o Ioane te tamaiti à Tetaria : ia haere oia e faaara te nunaa i te parau no teie tamaiti tei tae mai i roto i te ùtuafare o Iotefa ma.
Te haapapu maira te parau no ta tatou ìrava e : Haere atura oia na te mau vahi atoà i te pae i Ioritana ra,i te poro haere raa, i te papetito tatarahapa ia faaorehia te hara.Te titau ra o Ioane, ia rave hia te tahi tapura ohipa : ia papetito hia i te papetito tatarahapa, raveà no te faaore i te hara, tei oia i tera manaò e, eiaha teie tamaiti, ia tomo i te vahi viivii. Ia tae mai ra te Fatu i te vahi mā, i roto i te taata mā.
Te papetitoraa e aore ra te faatavairaa i te hoê taata, hohoà te reira no te hoè taata e hopura ra i te pape, te tamāra ia’na. Tamā i te tino, te hoê teie hohoà rapae no te tamā i te mea, è vai ra i roto mai. Tera pai ta Ietu e parau ra e : Aita e peàpeà tera e haere atura i roto, tera i roto e haere maira i rapae, tei reira te mea fifi. Ioane e tamaiti faaroo teie, tamaiti e haapaò ra i te hinaaro o te Atua, tamaiti e haapaò ra i te faaueraa.
Hohoà mau teie no tavini o te Atua, te parau ra te mau tupuna ; e taata teie, e toa teie. Aita hoè ohipa i tapeà ia’na no te haere e faatupu i faaueraa. Taa noa’tu ai te parau no te faariiraa mai e aore ra te faarii ore raa mai te taata i ta’na titauraa. Ua haere oia, ua haapaô i te faaueraa. Tei hea tātou i mua i teie parau. Tei hea tātou i mua i te titauraa a te Atua ia tātou nei. Te nahea nei ta tātou pahonoraa.
No Ioane, e ere noa i te parau tei tae i roto i te tarià o to’na metua tane ta’na e faatupuraa, mai te mea ra, na roto i te òhipa ta’na e rave ra. Te faatupu atoà raa oia i te tahi tohu na te hoê perofeta oia hoi o Itaia tei naô mai e :<<E reo no te hoê i te poro haerea i te metepara ra, A haamaitai i te eà o te Fatu, e faatitiaifaro i to’na haereà. Ia hope te peho i te faaîhia, ia hope te mouà, e te mau aivi i te haapapuhia ; ia faatitiaifarohia te éà piô, e ia haamaninahia te eà puupuu ; Ia ite te taata atoà i te ora à te Atua.>>
Te faaroo o Ioane i te faaueraa a te Atua, te faaite atoà maira i to’na here i te taata. No te mea , te òhipa ta’na ravera, e ere nona iho, no te Atua ra, e no te mea no te Atua, aita oia e mataù nei te pohe, ta’na e peàpeà ra tera ia reo i roto i te pene ono i te naò raa e : Ia ite te taata atoà i te ora a te Atua . Ia haapoto tātou i teie manaò : Ia ora te taata.
Te mea teie, e titiaifaro ai to’na eà, e î ai te mau peho, e papu ai te mau aivi, e manina ai te eà puupuu. Te haapii maira teie parau ia, i te huru mau no te taviniraa .
Ta tātou ìrava, te naò raa :<< Haere atura oia na te mau vahi atoà i te pae i Ioritana ra, i te poro haerea i te papetito, i te papetito tatarahapa ia faaorehia te hara ;>>I roto i teie tiairaa, te titauhia ra ia tātou, ia ineine, ia ineine i te parau no te taeraa mai te Fatu. I toto i to tātou oraraa. Ia piri anaè mai te hoê oroà , e tama tātou i te fare, e faanaho ia ateatea te vahi arearearaa, faaùnaùna hai e te vai atu ra.
Te parau mai ra teie parau i taua : Tei hea atura taua i te vairaa, ua ineine ānei taua. Te titauraa a Pauro i te tahi taiòraa na tātou no teie mahana : Ia oaoa i te Fatu eiaha e faaea. Te oaoa ra ānei tātou i teie parau no te taeraa mai o te fatu.
Iaorana
Hitiùra BENNETT Òrometua