Tiaìraa 2006
Tāpati i te 17 no Titema 2006
Toru no te Tiaìraa
Ruta (Ev) 3 : 7-19
Ir 8 vāhi matamua : « E tenā na, a tuu mai i tei au i te tātarahapa ; e eiaha òutou e parau i roto ia òutou iho e, O Âperahama to mātou metua…»
E hoa here mā, Ia haamaitaìhia te Atua no to tātou fārereiraa i teie nei tāpati, i roto i te parau no te tiaìraa i te taeraa mai to tātou Fatu. Tiaìraa mātauhia e tātou i te mau matahiti atoà, e tià ihoā rā ia tātou ia haamanaò noa i teie nei òhipa faufaa mau no to te ao atoà. No te mea atoà hoì e, te tiaì nei tātou, e mea tià ia tātou ia faaineine e te mea atoà ia ta Ioane Pāpetito e tītau ra i te feiā atoà i haere mai no te faaroo ia na e no te pāpetito ia rātou. Te tītau atoà ra o Ioane ia tātou i teie mahana ia faaineine. Eiaha ta tātou tiaìraa ia riro noa ei tiaìraa, ia riro rā ei faaineineraa ia tātou tātaìtahi.
E rave rahi mau taata tei haere mai e faaroo i te « reo no te hoê i te poro haereraa i te mētēpara ra. A haamaitaì i te èà o te Fatu, e faatītīàifaro i to na haereà. Ia hope te peho i te faaîhia, ia hope te mouà e te mau âivi i te haapāpūhia ; ia faatītīàifarohia te èà piò, e ia haamaninahia te èà puupuu ; ia ìte te taata atoà i te ora a te Atua. »
E hoa here mā, te ìte ra tātou i roto i ta tātou taiòraa, te rahiraa taata i haere mai e faaroo ia Ioane Pāpetito. Ua ìte atoà tātou e, e ta Ioane atoà e haamanaò ra ia tātou e, e rave rahi mau taata tei haere mai mā te manaò ìno, e rave rahi tei òre i pāpū e, e aha mau na ta Ioane òhipa. Te nā ô nei te ìrava 8 i te vāhi matamua i te nā-ô-raa e, « E tenā na, a tuu mai i tei au i te tātarahapa ; e eiaha òutou e parau i roto ia òutou iho e, O Âperahama to mātou metua…»
Terā te manaò o te rahiraa taata i âmui mai, i roto i to rātou feruriraa, ua ora rātou no te mea, e huaai rātou na Âperahama. Ua pāpū ia rātou e, i ô noa, ua ravaì, aita ta rātou e tuhaa ê atu, ua ora ê na rātou. Te hinaaro nei rā Ioane, e haamanaò ia rātou e, eita e ravaì noa i ô, aita atoà rā o Ioane e parau ra e, e mea faufaa òre te parau o Âperahama. Aita atoà o ia e parau ra e, e mea faufaa òre te mau tupuna, e hiò rā to rātou tiàturiraa i to rātou Atua. E mea tià ia hiò e aha to Âperahama huru i mua i to na Atua, to na tiàturiraa i to na Atua, to na tāviniraa i to na Atua, to na hereraa i to na Atua. Te mea e tano te taata ia ìte, eiaha rātou e manaò e, te òhipa ta Âperahama i rave, no rātou atoà ia, eita eita roa atu. Te tītau nei rā o Ioane ia rātou e, e rave mai ta Aperahama i rave, e rave te huru o Âperahama, te mea ihoā ia ta to na huaai e ère ra.
Te manaò noa ra rātou e, te tano noa ra rātou i roto i ta rātou mau faanahoraa, te faaara mai ra o Ioane e, eita, i ui ai ratou e, « E aha mātou », te auraa, nā hea ia. E rāveà ta Ioane oia hoì, te taui-noa-raa ia i to rātou huru e ta rātou mau peu. Hoê hiòraa. No te terona, eiaha o ia e tītau i tei òre i haapaòhia na e rātou. Te auraa, e tītau noa tei faanahohia eiaha e ani atu ā, te èia rā ia.
E hoa here mā, te nā ô atoà mai ra o Ioane ia tātou e, a hiò i to tātou huru, no te mea no te fārii i teie nei taata taa ê, te tītauhia ra ia tātou ia taui i to tātou huru mai ta na i tītau i te mau taata no to na tau. Terā taata e tiaìhia ra, eere te taata haapaòraa òre, e Atua rā. Eere te òhipa rahi ta Ioane e tītau mai ra ia tātou, eere i te òhipa rahi. Ua horoà mai o ia i te mau rāveà, na tātou ihoā rā e hiò.
Te tiaì nei tātou i te Fatu, te auraa, e fārii ia ia na. Te parauhia ra e, e nūnaa taata tātou tei ìte i te fārii, no roto roa mai teie huru to tātou i to tātou mau tupuna : ua ora ia tātou i terā vāhi. Te auraa, e rave mai i terā huru, te fāriiraa i to tātou Fatu, nā roto i te òaòa, nā roto i te hau, nā roto i te here, no te mea e nūnaa here tātou i te tahi, here i to tātou Atua, te auraa, ua ineine noa tātou i te fārii i teie nei Atua, haamanaò rā tātou e, ua ìte atoà taua Atua ra i to tātou huru, te mea e vai ra i roto i to tātou àau. Eita e tano e haavarevare, eita e tano e haavare, e fārii maitaì ihoā rā i teie nei Fatu, ta tātou e haamanaò nei i te mau mahana atoà, i te mau matahiti atoà. Eiaha tātou e rave mai teie mau taata i roto i ta tātou taiòraa, i nià noa ia Âperahama, ua ora rātou. E rave mai rā, mai ta Âperahama i rave. No tātou i teie mahana e i to tātou mau pae fenua, e rave i te huru no to tātou mau tupuna, to rātou tiàturiraa i to rātou Atua, maitaì ai to rātou oraraa, maitaì ai to tātou Atua, maitaì atoà ai ta tātou fāriiraa i to tātou Fatu ia Ietu Metia. E hoa here mā, ia maitaì noa tātou i roto i teie nei tiaìraa, ia maitaì atoà tātou i teie nei haamanaòraa, ia maitaì atoà tātou i teie nei ôroà no te fānauraa…IA ORA NA
Poetini vahine Òrometua
Tapati 24 no Titema 2006.
Maha no te Tiaìraa
Tïaìraa maha : Mataio 1 : 18 – 25.
E hoa ìno mä e, te mahana teie ta tātou i faataa no te âmui i roto i te pureraa. E taime e haapapu ai tātou i to tātou tiàturiraa i teie fatu to tātou. No na te fanauraa i faaìtehia e ta tātou taiòraa. E fanauraa huru fifi teie i roto i te faatiàraa a Mataio. No te mea, ua hapü te vahine i momoàhia ia Iotefa. O te mea ia i òre i faariihia e te ture. I roto i te teuteronomi 22 : 23. e tuìhia te vahine e te tane i rave ia na ra i te ôfaì. O raua toopiti atoà te pohe i mua i te ture. I roto i teie parau, e piti atoà fifi teie e faaühia nei e Iotefa. A tahi, éere o ia te metua tane o teie tamarii i roto i te ôpü o maria. O te mea ia e faatupu i te ìnoino e te pohehae i roto i to na àau. A piti, E riro Iotefa i te taa ê i ta na vahine momoà. Inaha, te reira ihoä te faanahoraa tumu a te ture. Te auraa, te riro nei teie parau ei ôhipa haamä roa i roto i te oraraa o teie tane. Te piri mai nei hoì te mahana e faaipoipo ai raua. Hoa here mä, ua ìte tātou i te huru o teie mau fifi i roto i to tatou oraraa. Te mea pinepine e ìte hia nei, e tupu roa te tahi peàpeà rahi i te ùtuafare. Te faaìno atu ra e te hüaìhia mai ra te tahi mau ìnoìno tahito i roto i te tauàparauraa. Aita rä te reira huru peàpeà i tupu i roto i teie na taata. Te mea noa i ravehia e Iotefa, te haapae huna noa raa i ta na vahine. Eiaha te taata ia ìte mai i teie ôhipa. Ua haapäpü atoà mai teie raveà ta teie taeaè e, ua tupu mau te mauiui i roto ia na. Aita rä o ia i hinaaro ia faufaa òre te ôhipa ta raua maria i haamata mai.
E aha rä te mea i tämarü i te manaò o Iotefa. Ia au i te faatià raa a Mataio, te Atua te tumu i marü ai te manaò o Iotefa, tei riro te merahi ei àuvaha i te manaò o te Atua. I roto i te îrava 20, te na ô ra te merahi i te parau raa e:
- « E Iotefa a tavita ra, eiaha e mataù i to vahine ra ia maria ia arataì mai i te ùtuafare, no te varua maitaì hoì i hapü ai o ia ».
Tera te manaò matamua i vai mai i roto i te parau raa a te merahi. Te uiraa rä, no te aha te merahi aita i faaea noa i nià i teie manaò. Te maramarama atoà ra tātou, te tano òre ia faaea noa te parau raa a te merahi i roto i teie manaò. E riro te ôpuaraa a te atua i te faaea noa i nià i te faahapüraa ia maria. Inaha, éere te reira te manaò tumu o te Atua i roto i teie parau. Ahiri hoì te reira noa ra, o ia hoì te faaara noa raa i te hapuraa o maria na roto i te varua matiaì, aita ia te parau o te Atua i atea atu i te parau o te tahi taata e hinaaro i te tamarii. No reira, éere teie hapüraa to maria i te hinaaro tamarii no te Atua. Ua türaì faahou hia rä te ôpuaraa a te Atua i mua. Ua haamau hia i nià i te ora ta teie tamaiti e faatupu. « E faaora hoì o ia i to na taata i ta rātou hara ». Teie te ôpuaraa tumu i na roto mai i teie parau. Ia ora te mau taata i faaroo e ua pee i te mau èà o te fatu. Te ìte ra tātou e, eaha ra te tumu i marü ai te manaò peàpeà o Iotefa. E tomo atoà hoì o ia i roto i te ôpuaraa faaora a te Atua. E mea tano rä tatou e parau e, àuaa atoà te here o Iotefa i ta na vahine. Na te reira i turu i teie faanahoraa ta te Atua tei na roto mai i te merahi i te faaararaa. Te auraa, ua tià roa ia Iotefa i te faaòromaì i to na mauiui no te faaüpootià i to na here i ta na vahine e to na hoì here i to na Atua. Te Atua o to na hui tupuna, Te Atua hoì i faaora mai i to na nunaa i parau hia ai to raua toopiti. O märia raua Iotefa.
I mua i teie parau ta tātou e hiò nei, ua haapäpü hia mai te iòa o teie àiü. O Ietu to na iòa. Inaha, i roto i te tohuraa a Itaia, o Emmanuera te iòa i faaìte hia mai. O ia hoì, te Atua io tātou. Ua pühapa mai te Atua i rotopü i te taata. Ua haere taata roa atoà mai o ia. O te mea mau teie e ìte hia ra i roto i te parau o to tātou fatu. E ôpuaraa teie na te Atua tei parahi roa mai i rotopû i te taata, e ua ora oia mai te mau taata atoà ra. E aha rä te mea i taui ai te iòa. Eaha rä o « Emmanuera » i riro mai ai o « Ietu ». Eere ānei na teie huru tupuraa o teie hapüraa e to na fanauraa i faatupu i te tauiraa o te iòa. Ua ìte hoì tātou e, te auraa no teie iòa Ietu, e ora te auraa, àore ia e faaora. Inaha, te ìteraa hia atu to na parau i roto i te oraraa o teie na taata, ua faatupu te reira i te fifi i mua i te ture. Ua riro Maria ei taata hara i mua i te mata o te ture. E aha hoì te mea matamua e tià i te atua ia rave i roto i teie ôpuaraa ta na. Maoti rä, te faaora ia Maria raua Iotefa i mua i te ture étaéta a te Ati Iuta. Te auraa, ua riro teie tauiraa iòa ei räveà faaora i na metua i amo mai i te tamaiti a te Atua. No reira, i roto i te haamataraa i te parau o Ietu, o Iotefa raua Maria na taata mätamua roa i faaora hia. Riro noa ai rä te iòa o te fatu ei faaìteraa i te parau o te ora, häroàroà atoà nei rä tātou e, no te here o te Atua i tupu ai te reira. No te here o te Atua ia tatou i riro mai ai o Emmanuera ei Ietu. No reira, Te na ô ra i roto i te, I Ioane 4 : 7, 8vh
« E au mau here e, e aroha tātou ia tātou iho, no ô mai hoì te aroha i te Atua ra, e o tei aroha ra, ua faafänauhia ia e te Atua, e ua ìte hoì o ia i te atua … E aroha hoì te Atua ». Iaorana.
Teihotua POHUE Òrometua.
Monire « hāmiāma mūri : TĒMA : TETAI »
Pureraa Noera 25/12/2006.
Taiòraa : Mataio 2. 1 – 12
Te vairaa o te manava o te parau : tei te ìrava :
1 : E ia fanau hia Ietu i Peterehema i Iutēa...
2 : Teihea te Arii fanau âpi o te ati Iuta nei, ite āè nei hoi mātou i to’na fetià i te hitià o te rā, i haere mai nei hoi mātou e tāhopu ia’na
Jésus étant né à Béthléhem en judée...où est le roi des juifs qui vient de naître ? car nous avons vue son étoile en orient et nous sommes venus pour l’adorer
AROHARAA
Noera. « 25 » no te âvaè titema « i te tāu o TĒMA e TĒTĀI io tātou nei » ; teie te mahana i tapaò hia e te taata ei haamanaò raa i te fanau raa o Ietu.
Te vahi fanau raa tei te oire ia no Peterehema i te fenua Iteraera : E tei nià i te mahana, i fanau hia’i oia, te taiò ā raa hia mai ta tātou tarena taiò mahana no te pāe rahi o te mau fenua o to tātou āo.
No te nunaa ati Iuta ra, e tarena taiò raa tāmahana taaê ihoā ta rātou.
Aita atoà ihoā ta rātou teie haamanaò raa i te fanau raa no Ietu, e faanaho raa ra ta rātou no te mau ratere e haere atu io rātou, no te faaî i ta rātou afata i te moni.
No tātou i te fenua nei, e mahana rahi roa atoà teie no tātou, e ua ō roa teie taio mahana i roto i ta tÂtou peu, no te haapaò atoà raa i to tātou iho mahana, i fanau hia’i tātou (to tātou noa teie maa mahana maitai, e toe nei, oia te fanau raa, te faaipoipo raa, e te pohe raa, te toeà o to tātou mau mahana, e mea taa ore roa ia)
Te parauraa : i te reo latino « natalis », no tātou ra i te fenua nei : e FĀNAU ia : te parau, ua parau anaè hia te parau o te fānau ra, e ôpu ia te parau : ua parau ānaè hia te parau o te ôpu fanau ra, ua farerei ia te âne ōra Varua o te Atua e te hine o te taata maitihia e te Varua o te Atua, te mea ia, i haamāere i te arii henoda, no te mea e fetià teie e faaite nei, i te tupu raa no teie parau, e ère ra, i te taata, e, e ère hoi i te mau taata no te fenua iho, teie e faaite nei i teie parau, e mau taata ê roa ra, e mau taata, no te tai fenua ê roa, oia te mau taata paari no te hitià o te rā mai, e mau taata e ère no rātou teie parau, e ère hoi teie i te ārii no rātou, e feia ē roa teie, e mau mātōì, e feia imi noa rātou, ia āu i te ìte i horoà hia ia rātou, no te mau tuatapaparaa o te mau fetià, e te ìte hoi, i roaà ia rātou i roto i ta rātou haapiiraa.
E ère rātou, i te feia politita, e ère atoà hoi ratou i te feia aratai no te haapaò raa faaroo, e mau âī vanaa ra, e feia paari, ua paari i roto i to rātou ìte, e toroà hoi no ratou, teie ta rātou e faaòhipa nei.
Te aratai nei te fetià i te taata, i te vahi fanau raa o te ōra o te mau taata atoà.
I mua i teie mau hiò raa, te ìte noa nei tātou i to tātou īti i mua i te rahi o teie parau e tupu nei, rahi i roto i to’na, tupu raa, rahi hoi i roto i to’na maitai, rahi i roto i to’na hau raa i te âano, ia faaāuhia i te rahi o te āo ta tātou e faaēa nei.
Te ite noa ra ia tātou eaha te tumu o heroda i huru ê ai, i te faaāra raa hia o ia i teie parau, no te fanau raa mai o te hoê Ārii, e Ārii hoi O IA no te ati Iuta, te nunaa mau ia ta’na e faatere nei, e, ia āu hoi i te huru o teie mau pāe fenua teie tiàraa arii, e tiàraa nōunōu hia, e noa’tu e ō te faanahoraa i roto i te taparahi i te hoê taata, no te haru raa mai i teie tiàraa, e faatāe ihoā ia te faanaho raa i reira.
No reira eiaha ihoā ia tātou e māere ia ôpūa o heroda i roto i to’na aau ē, e faarii haavare noa i teie parau i taitai hia mai e teie mau mātoi, no te mea o te raveà noa teie, i teie taime o te tià ia rave hia e tupu āi to’na hinaaro no te taparahi, i teie âiu fanau âpi roa ta te fetia e faaāra nei to’na vahi fānau raa.
A tahi roa ra hoi teie huru ôpūa raa taparahi raa taata, i nià i te hoê âiū, aita i fānauhia atura, e o te māu atu hoi i te tiàraa arii, a tupu ai mai teie ta tātou e ite nei.
Aitā hoi i faatoroà hia atura, te taparahihia nei : e faaāraa noa teie ia tātou ē, e ère teie i te òhipa na te taata, e faanaho raa ra na te Atua, eita iho ā ia e roaa i te feruriraa taata nei ia tuatapapa.
E Ārii teie no te feia e faaroo i te Ātua o te Ōra, O vai mā teie feia, o te mau taata atoà ia, tei ìte i to rātou haavi noa raa hia e te hara, o te haapohe noa nei hoi ia rātou, e ta hāte ôpu pāiā ore e àmu noa nei, te āu raa ! e Ārii teie e haere mai nei e pohe, i roto ra, i te ôpuaraa a to’na Metua no te faa-ora i to te āo, ta te pohe e horomii noa nei, e ère roa’tu ra no te haapohe i te tahi no te haru i te tià raa arii mai ta herota e nōunōu noa nei. No reira te ôpua raa taparahiraa, ta herota e ôpua nei, te ôpua nei iho ā oia i te taparahi ia’na iho.
Te Noela i teie nei, ia āu i te mau hiò raa i hia āê nei, te faaineine raa ia, ia tātou te feia faaroo i te taparahi raa i to tātou taata tahito e aratai noa nei ia tātou, i roto i te ino o te ora raa o teie mahana, te ino e farerei hia nei e ta tātou mau tamarii, e tātou atoà iho hoi, ia hiò hia e ère faahou na to tātou aau e aratai nei ia tātou, na te faahiahia ra o to tātou ōra raa, e te moni atoà hoi, ua moè hia te fetiiraa e vai nei i roto ia tātou, i riro ai tātou ei taata tumu no teie fenua.
I te hiò raa te riro nei te noela i teie mahana, ei faaātea roa raa ia tātou te tahi e te tahi, e te haapaò noa raa hoi ia’na iho e ua tāe roa te reira i te faaêreraa te fetii i te fetii iho i te tapū fenua, noa’tu ia hoê ā tātou, e ère faahou na te âau e faaō nei i te taata i nià i te fenua fetii, na te « papier » ra.
Te Noera i teie nei, e tāime ia e faaàpi ai te hui faaroo i to’na parau e ta’na atoà hoi fāiraa faaroo, i te Fatu ta’na e mātaù nei, e ta’na atoà hoi e tāvini nei, e ère teie i te ohipa ôhie i teie nei, no te mea aita faahou te taata i nià i te fenua te ōra raa, tei roto ra i te āore, te āore ihoā ta’na iho i hamani, i roto i to’na iho feruriraa. Riro mai nei hoi te taata tupu ei taata tāpuhia. E mea tià paha i te taata nei ia imi faahou i te vahi, i Fanau hia’i te Fatu o te Ora e te māitai, mai te mau matoi e imi nei i te Ōra, ta te fetià e faaite nei. I teie mahana te vahi imi raa moni te vahi oaoa āè te noera, ta tātou ia vahi āu âè : faaitoito : Ia Ōra i teie noera.
Teauè TUHEIAVA Òrometua
PURERAA NO TE PÖ MATAHITI
Tapati 31 no tìtema 2006
Ruta 2/39-52
E aha ôrua i ìmi ai ia ù ? aita ôrua i ìte, e ia haapaò vau i ta ta ù metua e tià ai ?
E hoa ìno mä e, ia ora na roa i te aroha o te Atua i to tätou nei färereiraa i teie nei pö hopeà no teie matahiti 2006.
Ia haamaitaìhia ia te Atua no ta na tiaì e ta na faaherehere ia tätou i te roaraa o te mau matahiti ta tätou i rätere mai. Ore noa atu ai tätou e faatupu i to na hinaaro, òre noa atu ai tätou e âpee i ta na mau faaueraa, to na rä aroha, to na here, tei nià ia ia tätou, i nià i to tätou mau ùtuafare.
Ua riro atoà rä teie pö ei taime e hiò ai tätou tätaì tahi i te huru o to tätou oraraa, to tätou oraraa ùtuafare, te oraraa päroita, te oraraa nünaa. I teie pö e haamanaò atoà ai tätou i tei moè i te matahiti e topa aè nei. Te feiä ta rätou i vaiiho mai. Eita e òre te parahi ra rätou i roto i te mänaònaòraa i tei herehia e rätou. No te Etärëtia nei, e haamanaòraa ia i te mau tävini i reva i to rätou tere hopeà.
E pö faufaa atoà no te mea, i teie pö tätou e tuatäpapa ai i te mau vähi i manuia, te mau vähi paruparu, hou a tomo ai i roto i te tau âpï e fatata mai nei. No reira, e taime maitaì no te ani i te Atua ia tauturu ia tätou i te hiòraa i to tätou parau mä te itoito, ia nehenehe ia tätou ia faatïtïàifaro i te mau vähi tei òre i tano roa. Ia tuu atoà rä tätou i ta na faatereraa i roto i to tätou oraraa no teie tere e ineine mai nei. E taime no te faatano-faahou-raa ia tätou i nià i te êà ta te Atua i faaau no tätou ia tupu to na hinaaro i nià i te fenua nei nä roto ia tätou. Ia riro mau ia teie taime haamoriraa ei taime haamaitaìraa na tätou ia na, ei taime atoà rä e püpü ai tätou i to tätou oraraa i roto i to na rima.
No te feiä i haere atu i Ierutarema e faahanahana i te ôroà « päta », mai tei matarohia e rätou i te mau matahiti atoà, te riro atoà nei teie ôroà ei faahoperaa no te tau tahito nä roto i te tämäraa ia rätou, te aniraa i te Atua ia faaòre mai i ta rätou mau hara hou a ìriti atu ai i te ûputa o te tau âpï. Mai te nünaa Iteraèra, i to na ìritiraahia mai te tïtïraa i Aifiti.
No Ietu, tei taeàhia te 12raa o te matahiti, te riro atoà nei teie nei ôroà « päta » mai te hoê ôroà taaê i roto i to na oraraa taata, i to na oraraa « âti Iuta ». Inaha, te hope nei te tau o te tamariiraa, e te tomo nei o ia i roto i te tau e riro ai o ia ei taata tei ìte i te haapaòraa, e tei märamarama i te mau parau e tià ia na ia faaroo no roto mai i te Parau a te Atua. Te parahiraa i rotopü i te mau òrometua i te hiero, te faaìte noa ra ia i to na hinaaro e faaroo i te Parau e te haapäpü noa ra i to na huru tïtau i te ìte e te märamarama no roto mai i taua Parau ra. E huru teie no te hoê taata âpï tei tïtau i te tahi mau pahonoraa i ta na mau uiraa e ua tae o ia i mua i te feiä tei ia rätou ra taua mau pahonoraa ra.
Areà nä Metua, tei tiàturi na mua roa i te huru o ta räua tamaiti, ta räua i mataro i te ìte e te tahi atu mau tamarii ia hoì rätou i Natareta. Oia hoì e tamarii mai te mau tamarii atoà. Te auraa, ua moèhia i nä metua e, ua tae Ietu i te ôtià o te hoê tau faufaa roa o to na oraraa. E noa atu to räua peàpeà, te horo haereraa na roto i te òire, te mäìmiraa ia Ietu, te faaìte noa mai ra ia to räua huru te òre ä te mata i àraàra i te tauiraa e tupu nei i roto i ta räua tamaiti.
E aha ôrua i ìmi ai ia ù ? aita ôrua i ìte, e ia haapaò vau i ta ù metua e tià ai ?
I mua i teie uiraa ta Ietu i to na nä metua, te faaìte atoà mai ra ia e, ua taui mau ä ta na hiòraa i to na nä metua. Eiaha i te mea, aita o ia e faatura faahou nei ia räua, te hinaaro noa nei rä e parau mai ia räua i te mea ta to na faaroo e faaue ra ia na e parau. Te parau ta tätou e faaroo nei no roto mai ia Ietu, e parau ia no te faaroo, e te òaòa no te hoê tamaiti tei ìte ia na ei taata i mua i te tahi atu mau taata paari, mai teie mau òrometua. Te auraa, na roto i teie nei âparauraa na na i te mau òrometua, ua ìtehia mai o ia ei tauaro ei taata e parau ta na të tià i te tahi ia faaroo atoà mai e ia ui e aore ia ia pahono mai.
I roto i teie hiòraa, aita to te rahiraa o te matahiti e parau, aita to te tiàraa e parau, maoti rä te Tumu parau ta rätou e tuaroì nei, oia hoì te Atua iho te Tumu o te Parau. Te Atua tei tomo mai i roto i ta rätou âparauraa, e tei riro ei tumu i hoê ai rätou. Eita atoà e òre i roa ai te âparauraa e i moèhia ai te hoìraa i te fare. E ère rä teie i te parau no Ietu anaè, e parau atoà rä no teie mau òrometua paari.
Te parau e tano e tapeà mai no tätou i teie mahana, te parau ia no ta tätou hiòraa i nià i te tomoraa i roto i te tahi te tau âpï. E aha te huru ta tätou färiiraa i te reira tau âpï, te huru o te taata e te mau faanahoraa ta te reira tau âpï e tïtau mai nei ia tätou i teie mahana. E faaea noa nei tätou mai nä metua nei i òre i ìte i te tauiraa i nià i ta räua tamaiti. Te auraa e faaea noa tätou i nià i te tahi hiòraa tahito no te tomo i roto i teie tau âpï e fä mai nei. E tano änei e tapeà noa i te tahi hiòraa tahito i nià i te tupuraa o te mau òhipa i te ûputa o teie tau e fä mai nei ?
E mai te peu noa atu e taui te hiòraa, i nià i te hea tauiraa e faatano ai ? i roto i te pahonoraa a Ietu i to na na metua, ua päpü ia na te hiòraa âpï e rave. Oia hoì, tei nià i te Atua to na tiàturiraa e haamau ai. Tei nià i te Atua to na mata e tutonu ai. I mua i te faaâpïraa ta te tau e arataì nei ia na, ua hinaaro Ietu i te haapäpü ia na i nià i to na tiàraa e ei tamarii na te Atua.
E parau teie tei au ia tätou te mau metua i mua i ta tätou mau tamarii, e parau no te Etärëtia i mua i te nünaa, e parau no te faatereraa o te fenua i te nünaa. No teie tau âpï e fä mai nei, e mea nahea ta tätou hiòraa i te feiä âpï, te nünaa i roto i teie tau âpï.
Tei ia tätou ra te haapäpüra i ta tätou pahonoraa no tätou e no te tuhaa i tïtauhia ai ia tätou ia haapäpü ia au i to tätou tiàraa ìte no te Metia.
Ia maitaì roa i te aroha o te Atua.
Taarii MARAEA òrometua
Pureraa matahiti âpï
Monire 01 no Tenuare 2007
Taiòraa : Tenete 1/1-13
Faaitoitoraa : Tenete 1/1-5
“Ua parau iho ra te Atua: Ei märamarama...ua faataa iho ra te Atua i te märamarama e te pöuri”
E hoa here mä e, ia ora na maitaì tätou i teie matahiti âpï ta te here e te aroha o te Atua i faatomo mai ia tätou mä te maitaì e te òaòa.
E parau mau roa hoì teie, te ômua faahou nei tätou i te tahi matahiti âpï. E ua päpü atoà rä ia tätou e tei roto tätou i te faanahoraa o te tau a te Atua. Te auraa ra, te tià nei tätou i mua i te aro o te Fatu o te tau, tei ia na te tiàmäraa i te faataaraa i te faito o te tau e au i te taata tätaì tahi.
E mai te mea e ua tae mai tätou i teie mahana, e mea titauhia ia tätou ia faahoì mäite i te mau haamaitaìraa atoà i te Atua ra i muri aè i te rä hoê matahiti taatoà to tätou fanaòraa mai i te mau maitaì atoà, e to tätou fariiraa i te aho ora ta te Atua i horoà faatau aroha mai ia tätou nei. Ua moèhia änei te reira ia tätou ?
I mua rä i te parau no te matahiti âpï ta tätou e tià nei e uiui atoà ai tätou; e aha rä te huru teie matahiti ta tätou e haere atu nei, e matahiti maitaì änei, aore rä e matahiti
ìno ? Noa atu rä e aha te huru no te mau òhipa e tupu mai, e faaitoito anaè tätou i te haere i mua i roto i te tau. Eita tätou e ôtohe, eita atoà tätou e mataù, no te mea e tei pihaì atoà iho te Atua ia tätou, a òre atu ai tätou e roaahia i te enemi ia haru.
I teie rä poìpoì e hoa here mä e, ua hinaarohia e faahoì ia tätou i mua i te parau no te hoê Atua tei ia na te mana o te parau. I ta na parau e tupu ai te mau mea atoà. E parau noa ïa tätou e tei mua tätou i te hoê Atua tei rahu i teie nei ao. E täpeà mai tätou i roto i teie manaò, òia te mana o te parau. Ia parau te Atua, i te reira ihoa taime e riro mai taua parau ra ei òhipa. Te auraa ra, aita te parau i vai noa ei parau e faufaa ore atu ai. E mea na roto hoì i ta na parau to te Atua haapäpü-atoà-raa mai i to na vairaa mai i te ao nei. Eere änei teie huru heheuraa i te parau o teie Atua i te tahi räveà e tauturu ia tätou i te haapäpüraa i to tätou tiàturiraa e to tätou faaroo ia na ? E Atua teie e oti ia na te mau mea atoà. No te aha ïa tätou e haere ê ai i te mau vähi e ìte ai tätou i te fifi.
Te faaìte noa mai ra Tenete 1/1-5: Na te parau a te Atua i tupu mai ai te märamarama e te pöuri. Te na òhipa matamua teie i iriti i te ôpuaraa a te Atua. No reira i te ômuaraa o teie matahiti âpï tei mua tätou i te parau no te märamarama e te pöuri. E tiàmäraa to tätou i te mäìti i te vahi i reira tätou e haamau ai i to tätou oraraa e to tätou mau haereà atoà. E mai te mea e e mau tamarii tätou no te märamarama, ua farii ïa tätou e ia tupu te tauiraa e te faaâpïraa i roto i to tätou oraraa. Ua faaruè tätou i te mau mea tahito atoà e te haere tià nei tätou na nià i te mau aratià atoà ma te märamarama o te parau a te Atua.
Òia mau, tätou tei tauhia e te märamarama o te parau a te Atua i teie mahana, te matara nei ïa i mua ia tätou te hoê matahiti âpï, òia te matahiti no te mau maitaì o te Atua. Te rä mau pëpë e te rä mau mäuiui to tätou, e tià roa i te märamarama o te parau a te Atua i te faaòre roa i te reira. Te auraa, e tià roa i te Atua ia rahu faahou ia tätou e ia faariro faahou ia tätou ei taata âpï.
E tüàti rä änei tätou , ia riro teie matahiti ei matahiti no te mau maitaì o te Atua ? Tei ia tätou ïa i te fariiraa i te reira. To tätou mau tarià, e faatoro tià atu ïa i nià i te parau a te Atua. Eita e òre tätou i te uiui ma te hiò i te tau i maìri. Ua rëni hoì te Atua i te àveià e au i te taata tätaì tahi ia rave. E i te mau taime atoà ua haapäpü noa mai ò ia i to na vairaa mai i pihaì iho ia tätou ma te horoà atoà mai i ta na mau tauturu. Te hinaaro mau nei te Atua ia rave tätou i te eà o te märamarama e ia rahi to tätou faaroo ia na. E ia òre tätou ia horo haere noa i te rä vahi e te rä vähi, no te mea e, i ô mai i te märamarama ra, e poüri ïa to reira e te pohe.
No reira, e te mau tamarii o te märamarama e, a rave anaè i te èà o te märamarama, e ia tupu na roto ia òutou te parau tià e te parau mau.
Amene
Taùhere HAMBLIN Òrometua